Maini gimin manderang dingtang dingtang chanchianiko daka? Ia chanchianio, mitamde ukon dakchongmotna nangenggipa gita ra·a. Mitam ong·gija dakna chanchianikoba nameba nikaia, indiba uni bon·kamanide gimaanionasan sokanga inede chanchisoja. Gisik gnange chanchigipade ong·gijaoni namen dingtangesa dakskaa. Darangan name dongna, name janggi tangna, gisik an·senge janggi tangna, ba man·e chana sikani gisik donga; indiba pilakande iarangko man·na amja.

  • Uni gimin mikkangchi re·engon maikai nambate tik ka·e dakgen?
  • Saksan dakna chanchiaigenma?
  • Ripengtangko dakchakna agangenma?
  • Pilakna bate Isolni dakchakaniko man·na Uo bi·e re·chakatgenma?
  • An·chingni gualani somaioba Isolan dongachim aro Uan dakchakgipaba ong·a. Indiba pangnan gualaniko dakchengesa ja·manosa Isolni dakchakaniko am·genma?
  • Guale dakachi duko ga·akna skangan Isolni dakchakaniko am·genma?

Dikdiksa nipilate chanchina nanganiara… “Angaba ukode ba uani giminde name chanchikuja, aro skangoni da·ona kingking dakenggipana batede mikkangchi janggi tanganina dakanian mongsonggipa ong·a,” ine tik ka·chenganian mongsonggipa ong·a.

A·gilsakosa ong·ani gimin bringimin janggi tangade gnang, indiba baseanide an·chingni kam! Uni gimin chanchie kam ka·aniode ong·ako aro namako daknasa chanchina nanga.

An·chingsa mikkangchiniko u·ijanaba donga, indiba Isolde u·iskaa. Ua Isolan u·ianiko aro ma·sianiko on·na man·gipa ong·chongmota (Daniel 2:21). An·chingsa Uko rasong chaate, Uoniko u·iani aro ma·siani bilko bi·na nanga. An·ching Isolni sikani gita ja·rikode, indide Ua pilakkon chu·sokatna ama. Bebera·an baksa kamkoba ka·ode, bi·anirangko knachaknaba Isolara ku·rachaka (Jakob 1:5-8).

Dakna Nanggijagiparang
(1). Ong·gija Kamchi An·tangko Ga·akaniona Dilani
Altuagipa kamrangoni bang·an pangnan namgipa aro chong·motgipa ong·na amja. Uarang basakoba mandeko duko ga·akata aro gimaaniona dilronga. Isol, Jonako salaramchi re·angchina watatoba, Nineveni manderangna kenani gimin saliramchipak re·angskaaha. Jona, mitchigipa aro kengnigipa manderangna aganprakna re·angana bate, jahaso songree Isoloni katangan altuagipa ong·a ine gisiktango chanchiachim. Indiba dal·gipa na·tokni minokako man·achi batesa, Nineveni manderangona re·ange aganprakena nangskaaha. Uni gimin altuae chanchiani kamrang pangnan bon·chotao neng·nikaniko on·ronga.

(2). Chanchigija On·kanganichi Ja·gitotani
Dambegipa me·chik bi·sa Amy minggipa, skul re·ako namnikjaenba ba·ra palnasa gisiko nangbataha. Salo skul re·oba ba·ra pale jakgitele janggi tangbaaha aro ukon chu·ongnikaiaha. Indiba bilsi 10-ni ja·mano bia ka·enba apsan kamko ka·angkuna neng·nikaha aro chonmitingo ka·e janggi tanggipachi cholina man·jaha. Unon ua, tangkakoba man·jaha aro collegechi re·naba chol ong·jaha. Altuae nikgipa kamko ka·achi, a·bachengo kusi ong·oba janggi tanga gimiknade ong·jaha! Chanchie tik ka·engon, da·aloni mikkangchi janggi tanganina niksamsoe dakosa ja·gitotaniko man·jawa.

(3). Ta·rakdugae Dakanichi Ja·gitotani
Basakoba maikoba chanchion, ta·rake dakakosa ong·nika aro ukon chu·sokate dona. Sastroo “Gitelna sengsobo,” ine ka·donganiko agananiara an·chingni am·enggipako man·na Gitelni dilanina senganiko miksonga. Beben, SENGSOBO inani gimin, mamingkoba dakgija sengsobebeode ong·aigenma? Ong·ja, indiba kamko ka·na chanchion, Gitel Isolni sikanina aro ku·pattianina sengsoan baksa kamko ka·anisa mongsonggipa ong·a (Git. 27:14). Maikoba daknasiengon, Isolara YES ine aganchakgenma ine Una sengode nama. Isol an·tangan do·gako chipna aro do·gako opileba dakchakna bil gnanggipa ong·a. Sastroo agana, “Indiba angade Jihovako nichaksogen; anga angni jokatani Isolna sengsogen; angni Isol angko knachakgen” (Mika 7:7).

(4) Goka Gita Chanchiani
‘Goka,’ inoan, u·i-ma·sigipani aganako aro an·tangan namja ine u·ieba uko dake an·tangko nosto ka·gipakon “gokani kam,” ba “goka” ine agana. Gualaonikoba skie ra·na man·e ine dake roaigipako aro ong·ako dakpilnaba sikgijagipakoara mai minggen? Indakgipa mandeni gimin Sastroo agana, “Ma·sigijagipa gure ba kotchor gita ong·nabe; Lagamni silchi aro lagamchi uarangko rim·rikna nanga; ong·jaode uamang nang·ni sepangona re·bajawa” (Git. 32:9). Sakgipinoniko ku·pattianiko man·na tarie re·angengon, mitamkode ra·chakna man·janaba gnang, indiba uaba namgipa ku·pattiani…! Atchiaoni mamingkoba dakkugijagipaona maikai sokbaaha, uko chanchiatode bang·akon nikatpilgen. Da·o uarangko u·iahaon, mikkangchi bilsi 20/30 janggi tanganio maiko dakskagnok? Dakgija ba ka·gijan’ rotaigenma ma dake-ka·e janggi tanggnok? Iarangna nipile namgipa chanchiani pangchakanirangko ka·mao niangna.

Dakchengna Nanggipako Skang Donbo
Mandeni gita dakna nanganide bang·en gnang. Indiba dakgnigipaoni badia mongsonggipa ong·skaa, ukosa an·ching u·ina nanga. Chadambeni salrangde mikkangchi janggi tanganina an·tangtangko tarisoanian ong·a. Uni giminsa badiako skang dakgen uko tik dake donchengna nanga. Mitam dambeni salrango chu·sokatna man·gipa ong·oba uarangko chu·sokatanide ja·manosa ong·genchim! D. L. Moody, jean an·tangni areao namen pala-sim·anio chu·soksranggipa ong·na sikengachim aro chu·sokroroengon, indiba salsao Sunday School skigipani sinasiengon uni studentrang gisiko nangbee Isolo bi·engako knaaha. Unon, D. L. Moodyni man·e cha·na sikani aro millionaire ong·na chanchisoani rang·sanan dingtangaha aro uni nikjagringsoaniara ramram kam ka·aniona sokbaaha. Ja·mano, D. L. Moody kangalgipa aro ramarango romikbranggipa bi·sarangna rakbate kam ka·na gisiko donaha aro ja·mano aganprakgiparangoni mingsinggipa saksa ong·baaha. Hoe beben, D. L. Moody jeko daka, ua gitan, tiktakde dakna amjawa; indiba maiaba bimangonade sokatnade man·gen. Anga an·tangko Isolni dilanina on·jawama? Isolna bame janggi tangode aro Uni ge·etanirangko dakode Isol an·tangan, an·chingni chanchisokpilgijakon dakna ku·rachakaha (Jer. 33:3). An·tangni sikaniko aro miksonganiko Isolna pakwatode, Isol nambatakon on·na ku·rachaka. Pilakkon dakna amaniona sokani pangchakani chabide Isolni jakni kamsa ong·a. Sastroo agana, “Anga ge·aha, Apollos chi ruaha, indiba Isol dal·ataha” (1 Kor. 3:6). Uni gimin jeko dakoba chong·motgipa bimang ong·aniona sokatanide an·tang saksano ong·ja. Isolni jakni kamsa. Uni jakni kamna anga sengsoengode, Una angni ka·saanikoba on·skana nanggen, Una bamna nanggen aro Uni ge·etanirangko manina nanggen. Romrangna Paulni segimin chittio indake agana, “Aro an·ching u·ia, Isolna ka·sagiparangna, Uni mangsonga gita okamgiminrangna, pilakan namgnina ka·paa” (Rom. 8:28).


Chanchiatangko Nipile Re·mikkangbo
Isol maiko nangnikenga, ua gitan chanchianiara ong·engama ma an·tangni gitasan chanchie re·mikkangengama? Angni nikani gitade, chanchiani tik ong·ahaode uan janggi tanga gimik angko kusi ong·atgen. Angko ong·atgipa Isolara angni mai dakako nangnika ba maiko dakna ge·etenga, ukoba nipilnade nangchongmota. Nambatanina re·bagiminchiniko nipilanide namgipa kam ong·a aro uan an·tangko nambatatna re·mikkanganio dakchakaniko on·gen. Examplena: Songgimin ge·sa krongko anga bawile adita somaina dongode, angasa miksulgen; sakgipinde miksuljawa. Dontongjokode haida anga a·mango ga·aknaba donga. Basakoba an·chingara re·mikkanganina nipile chanchianiko dakoba batesa namjabataona sokanga aro an·tangko dos gnanggipa mande pil·ata. A·chik Katta agana, “Salgichi nigitoe stuode an·tangkon ga·akdapa” ingipade ong·chongmotbebea. Pilakan namgipa jik-se ong·na sika, nokdang namao ong·pana sika, an·tangtangko mingsingatna sika aro kusi ong·e dongnaba sika! Indiba ua pilakkode an·ching chagronga bang·ja; maina ua chanchianiko be·en pil·atgipade Isol Jihovasa ong·a. Uni gimin angni ku·mongrimanide iasan: “O, Gitel Isol, anga nang·ni namnikako pangnan dakna amjaoba jeko angni janggi tanganina na·a donsoenga, uako u·ina aro dakna amna gita angko dakchakbo.” Jedake Isol De Jisu Kristoba Uni Pagipao bi·aha (Luke 22:42).

Baikamgipa Tom·tomaniko Am·chengbo
Janggitangna tom·tomaniko gimikna bate skang man·chenganiara namen nama. Tom·tomani dongosa re·mikkanganio, chanchianio aro mingnama kamrangko chu·sokatanio ka·sine ka·na amgen. Sastroo agana, “Aro Kristoni tom·toma na·simangni ka·tongrango pamong ong·china, jena be·ensano na·simang okamako man·aha; aro mittelgiparang ong·bo” (Kol. 3:15). Ia Sastroni bako ‘pamong’ ingipa kattako English Standard Version (EVS) Bibleode ‘rule’ inesa seskaa. Kattani miksonganide ma·rapa, indiba an·chingni ka·tongko ‘sason’ ka·na on·aniara ba batamaniara uan, ‘pamong’ ba pilakni kosako nokgipa ong·aniko mesokskaa. Ia ‘sason’ ba English katta ‘rule’ ingipara cricket kal·giparangni kal·anio pilakko rai on·timgipa ‘UMPIRE’ gita chacha ong·chongmota. Ia ka·tongni ‘umpire’-sa gisikni chanchianiko, katta agananiko, cholon-bewalko jakkalaniko, re·a-doaniko, cha·a-ringaniko pilakkon ‘iade ong·ja,’ ‘iade namja’ ba ‘iasa ong·a’ ine mesokgipa ong·a. Jensalo Isolni tom·toma gisik an·chingni ka·tongrango asonggen, unon an·chingni chanchiani aro janggi tanganirang pilakan gipinrangoni dingtanggen. Isolni ong·atgimin mande ong·oba an·ching pilakkode u·igimalgipa ong·ja: Isolsan! An·ching ua tom·tomaniko Isoloniko am·jaode, indide an·tangtango uko man·ja amja aro jensalo ua tom·tomani dongja, unon an·ching Isolni miksongani gita janggi tangna man·ja. An·ching Isolni namarangna ong·atako man·gimin ong·naba donga, indiba Isol gride dingtangmancha miksonganirang dongoba mamingba ong·ja.

Na·a Maiko Chanchia?
An·ching, poraioba, kam ka·oba, jechiba re·oba aro dingtang dingtang biaprango a·gilsakni gita ba toromni gita dangdike on·oba Isolni dilanina an·tangtangko on·ode; indide Uni on·a kamrangko an·ching simsake ka·gen. Chanchisogipa mande angan ba na·an ong·oba chu·sokatgipade ‘Isol’-sa ong·tela! Maina an·chingni chanchianina bate Uni chanchianirang dal·bata; an·chingni tik ka·anina bate, Uni daksoanian ning·tubata aro an·chingni dukrangna bateba, Uni Depante Jisuni duk chakan apalbata. Uni gimin an·ching gisik gnanggipa ong·e chanchie kamko ka·na nanga. Anga dakna ama ine nikode, uko angara Isolni sikanio gitan dakgipama? Ma, angade dakna amja ine u·iode ukoara angara bi·an baksa Isolni sikanina pakwate re·mikkanggenma? Uni gimin, dakna chanchion, sikatang aro a·mikbrang dakgija gisik on·e aro name chanchie tik ka·giparang ong·ode, A·chik chadamberang Isolni ra·doaniko man·telgen.

Isol sakantinan pattichina, Amen.

Contact Us

en_USEnglish